ಜನಜಾಗೃತಿ ವಾಯ್ಸ್ : ಮಾಟ-ಮಂತ್ರ ಇಲ್ಲವೇ ಇಲ್ಲ!

ಮಾಟ-ಮಂತ್ರವೆಂಬುದು ಸುಳ್ಳು ಅಪನಂಬಿಕೆ; ಭಯವೇ ದೊಡ್ಡ ಅಪಾಯ!

“ಮಂತ್ರಕ್ಕೆ ಮಾವಿನಕಾಯೇ ಹುದುರೊದಿಲ್ಲ, ನಿಂಬೆ-ಮೆಣಸಿನಕಾಯಿಗೂ ಯಾವುದೇ ಅತೀಂದ್ರಿಯ ಶಕ್ತಿ ಇಲ್ಲ” — ವೈಜ್ಞಾನಿಕ ಚಿಂತಕ ಡಾ. ಹುಲಿಕಲ್ ನಟರಾಜ್

ಜನಜಾಗೃತಿ ವಾಯ್ಸ್ ಬೆಂಗಳೂರು:
ಮಾಟ-ಮಂತ್ರ, ವಾಮಾಚಾರ, ನಿಂಬೆ-ಮೆಣಸಿನಕಾಯಿ, ಮಂತ್ರಶಕ್ತಿ ಸೇರಿದಂತೆ ಅತೀಂದ್ರಿಯ ನಂಬಿಕೆಗಳ ಕುರಿತು ಸಮಾಜದಲ್ಲಿ ಹಲವು ರೀತಿಯ ಭಯ ಮತ್ತು ಅಪನಂಬಿಕೆಗಳು ಇಂದಿಗೂ ಮುಂದುವರಿದಿವೆ. ಆದರೆ ಇವುಗಳಿಗೆ ವೈಜ್ಞಾನಿಕ ಆಧಾರವಿಲ್ಲ ಎಂದು ವೈಜ್ಞಾನಿಕ ಚಿಂತಕ ಡಾ. ಹುಲಿಕಲ್ ನಟರಾಜ್ ಸ್ಪಷ್ಟವಾಗಿ ಹೇಳಿದ್ದಾರೆ.

ಮಾಟ-ಮಂತ್ರ ನಿಜವೇ ಅಥವಾ ಕೇವಲ ನಂಬಿಕೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, “ಇದು ನಿಜವೂ ಅಲ್ಲ, ವೈಜ್ಞಾನಿಕ ನಂಬಿಕೆಯೂ ಅಲ್ಲ; ಇದು ಸುಳ್ಳು ಅಪನಂಬಿಕೆ” ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಮಂತ್ರಕ್ಕೆ ಮಾವಿನಕಾಯೇ ಹುದುರೊದಿಲ್ಲ!

ಮಂತ್ರ-ತಂತ್ರಗಳಿಂದ ವಸ್ತುಗಳಲ್ಲಿ ಯಾವುದೇ ಅತೀಂದ್ರಿಯ ಬದಲಾವಣೆ ಸಾಧ್ಯವಿಲ್ಲ ಎಂದು ಹೇಳಿರುವ ಡಾ. ಹುಲಿಕಲ್ ನಟರಾಜ್, “ಮಂತ್ರಕ್ಕೆ ಮಾವಿನಕಾಯೇ ಹುದುರೊದಿಲ್ಲ” ಎಂದು ಪ್ರಶ್ನಿಸಿದ್ದಾರೆ.

ಅದೇ ರೀತಿ ಮನೆ, ಅಂಗಡಿ, ವಾಹನ ಅಥವಾ ಇತರೆ ಸ್ಥಳಗಳಲ್ಲಿ ಕಟ್ಟುವ ನಿಂಬೆಹಣ್ಣು–ಮೆಣಸಿನಕಾಯಿಗೆ ವಿಶೇಷ ಅತೀಂದ್ರಿಯ ಶಕ್ತಿ ಇದೆ ಎಂಬ ನಂಬಿಕೆಯನ್ನೂ ಅವರು ತಳ್ಳಿಹಾಕಿದ್ದಾರೆ.

“ನಿಂಬೆಹಣ್ಣು ಮತ್ತು ಮೆಣಸಿನಕಾಯಿಯಲ್ಲಿ ಯಾವುದೇ ಅತೀಂದ್ರಿಯ ಶಕ್ತಿ ಇಲ್ಲ. ಹೆದರಿಸುವುದಕ್ಕೋಸ್ಕರ ಇವುಗಳನ್ನು ಬಳಸಿಕೊಳ್ಳಲಾಗುತ್ತದೆ” ಎಂದು ಅವರು ಹೇಳಿದ್ದಾರೆ.

ಮಾಟದಿಂದ ಆರೋಗ್ಯ ಹಾಳಾಗುತ್ತಾ?

ಮಾಟ-ಮಂತ್ರದಿಂದ ವ್ಯಕ್ತಿಯ ದೈಹಿಕ ಆರೋಗ್ಯ ಹಾಳಾಗುತ್ತದೆ ಎಂಬ ನಂಬಿಕೆಯ ಬಗ್ಗೆಯೂ ಅವರು ಸ್ಪಷ್ಟನೆ ನೀಡಿದ್ದಾರೆ.

“ಮಾಟದಿಂದ ಮನುಷ್ಯನ ಆರೋಗ್ಯ ಹಾಳಾಗುವುದಿಲ್ಲ. ಆದರೆ ಮನುಷ್ಯನ ಮನಸ್ಸು ಅದರ ಪರಿಣಾಮಕ್ಕೆ ಒಳಗಾದರೆ, ಆತ ಅನುಭವಿಸುವ ಭಯ ಮತ್ತು ಆತಂಕದಿಂದ ಮಾನಸಿಕ ಹಾಗೂ ದೈಹಿಕ ತೊಂದರೆಗಳು ಕಾಣಿಸಿಕೊಳ್ಳಬಹುದು. ವ್ಯಕ್ತಿ ಅದನ್ನು ಹೇಗೆ ಸ್ವೀಕರಿಸುತ್ತಾನೋ ಅದರಂತೆ ಪರಿಣಾಮ ಉಂಟಾಗುತ್ತದೆ” ಎಂದು ಅವರು ಹೇಳಿದ್ದಾರೆ.

‘ಮಾಟ ತೆಗೆದುಹಾಕುತ್ತೇವೆ’ ಎನ್ನುವುದು ಮೋಸ!

ಮಾಟ ಮಾಡಲಾಗಿದೆ, ಅದನ್ನು ತೆಗೆದುಹಾಕುತ್ತೇವೆ, ಮಂತ್ರದಿಂದ ಸಮಸ್ಯೆ ಪರಿಹರಿಸುತ್ತೇವೆ ಎಂದು ಹೇಳಿ ಜನರಿಂದ ಹಣ ಪಡೆಯುವವರ ಬಗ್ಗೆ ಎಚ್ಚರಿಕೆ ವಹಿಸಬೇಕೆಂದು ಅವರು ಸೂಚಿಸಿದ್ದಾರೆ.

“ಮಾಟ ತೆಗೆದುಹಾಕುತ್ತೇವೆ ಎನ್ನುವುದು ಶೇಕಡಾ ನೂರು ಶುದ್ಧ ಸುಳ್ಳು ಮತ್ತು ಮೋಸ” ಎಂದು ಡಾ. ಹುಲಿಕಲ್ ನಟರಾಜ್ ಹೇಳಿದ್ದಾರೆ.

ಇಂತಹ ಹೇಳಿಕೆಗಳನ್ನು ನಂಬಿ ಜನರು ಹಣ, ಸಮಯ ಕಳೆದುಕೊಳ್ಳುವುದರ ಜೊತೆಗೆ ತಮ್ಮಲ್ಲಿರುವ ಭಯವನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳುವ ಸಾಧ್ಯತೆ ಇದೆ ಎಂಬುದು ಅವರ ಅಭಿಪ್ರಾಯ.

ಮಾಟದ ಭಯವೇ ದೊಡ್ಡ ಅಪಾಯ!

ಮಾಟ-ಮಂತ್ರಕ್ಕಿಂತ ಅದರ ಮೇಲಿನ ಭಯವೇ ಸಮಾಜಕ್ಕೆ ದೊಡ್ಡ ಅಪಾಯ ಎಂದು ಅವರು ಹೇಳಿದ್ದಾರೆ.

“ಮಾಟದ ಭಯವೇ ಶೇಕಡಾ ನೂರು ದೊಡ್ಡ ಆಘಾತ. ಅದು ವ್ಯಕ್ತಿಯ ಮನಸ್ಸಿನ ಮೇಲೂ, ಸಮಾಜದ ಮೇಲೂ ಕೆಟ್ಟ ಪರಿಣಾಮ ಬೀರುತ್ತದೆ” ಎಂದು ಅವರು ತಿಳಿಸಿದ್ದಾರೆ.

ದುರ್ಬಲ ಮನಸ್ಥಿತಿಯಲ್ಲಿರುವ ವ್ಯಕ್ತಿಗಳು ಇಂತಹ ಮಾತುಗಳನ್ನು ಸುಲಭವಾಗಿ ನಂಬುವ ಸಾಧ್ಯತೆ ಇರುವುದರಿಂದ, ಜನರಲ್ಲಿ ವೈಜ್ಞಾನಿಕ ಮನೋಭಾವ ಮತ್ತು ಪ್ರಶ್ನಿಸುವ ಮನಸ್ಥಿತಿ ಬೆಳೆಸುವುದು ಅಗತ್ಯ ಎಂದು ಅವರು ಪ್ರತಿಪಾದಿಸಿದ್ದಾರೆ.

‘ಘೋಸ್ಟ್ ಎಕ್ಸ್‌ಪೀರಿಯನ್ಸ್’ ಕೂಡ ಮನಸ್ಸಿನ ಆಟವೇ?

ಭೂತ, ಆತ್ಮ ಅಥವಾ ಅತೀಂದ್ರಿಯ ಅನುಭವಗಳ ಬಗ್ಗೆ ಮಾತನಾಡಿದ ಅವರು, ಇಂತಹ ಅನುಭವಗಳಿಗೆ ಮನಸ್ಸಿನ ಭಯ ಮತ್ತು ಕಲ್ಪನೆಯೂ ಕಾರಣವಾಗಬಹುದು ಎಂದು ಹೇಳಿದ್ದಾರೆ.

“ಇದು ಆಟವೋ, ಮನಸ್ಸಿನ ಮಾಟವೋ? ದುರ್ಬಲ ಮನಸ್ಸಿನ ಮನುಷ್ಯನ ಆಟ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ವಿಜ್ಞಾನಕ್ಕೆ ಸವಾಲಾಗಿರುವ ಮಾಟದ ಘಟನೆ ಇದೆಯೇ?

ಮಾಟ-ಮಂತ್ರಕ್ಕೆ ಸಂಬಂಧಿಸಿದಂತೆ ವಿಜ್ಞಾನಕ್ಕೆ ಸವಾಲಾಗಿರುವ ಯಾವುದೇ ನೈಜ ಘಟನೆ ಇದೆಯೇ ಎಂಬ ಪ್ರಶ್ನೆಗೆ ಡಾ. ಹುಲಿಕಲ್ ನಟರಾಜ್ ಅವರು “ಖಂಡಿತ ಇಲ್ಲ, ಸಾಧ್ಯವೂ ಇಲ್ಲ” ಎಂದು ಸ್ಪಷ್ಟವಾಗಿ ಹೇಳಿದ್ದಾರೆ.

ಅವರ ನಿಲುವು ಸ್ಪಷ್ಟವಾಗಿದೆ:
“ಮಾಟ-ಮಂತ್ರ ಖಂಡಿತ ಇಲ್ಲ. ನಡೆಯುವುದಿಲ್ಲ.”

ಜನರು ಭಯದ ಬದಲು ವೈಜ್ಞಾನಿಕ ವಿಚಾರಧಾರೆ ಬೆಳೆಸಿಕೊಳ್ಳಬೇಕು. ಯಾವುದೇ ಅಸಾಮಾನ್ಯ ಘಟನೆ ಎದುರಾದರೂ ತಕ್ಷಣ ಮಾಟ-ಮಂತ್ರ ಎಂದು ನಂಬುವ ಬದಲು ಅದರ ಹಿಂದಿರುವ ನೈಜ ಕಾರಣವನ್ನು ಹುಡುಕಬೇಕು ಎಂಬ ಸಂದೇಶವನ್ನು ಅವರ ಮಾತುಗಳು ಸಾರುತ್ತವೆ.