ಜನಜಾಗೃತಿ ವಾಯ್ಸ್ : ಮರದ ಅಂಬಾರಿ ಹೊತ್ತು ಸಾಗುವಾಗ ಕ್ಯಾಪ್ಟನ್ ಮಹೇಂದ್ರನಿಗೆ ಆತಂಕ!

ಕೆ.ಆರ್. ಆಸ್ಪತ್ರೆ ಸರ್ಕಲ್ ಬಳಿ ಸುಮಾರು 45 ನಿಮಿಷ ಅಂಬಾರಿ ಸಮೇತ ನಿಂತ ಗಜಪಡೆ “ಅಂಬಾರಿ ತೆರವುಗೊಳಿಸಿ ಅರಮನೆಗೆ ವಾಪಸ್; ಮಹೇಂದ್ರನ ಸುರಕ್ಷತೆಗೆ ಅಧಿಕಾರಿಗಳ ಮುನ್ನೆಚ್ಚರಿಕೆ”

ಜನಜಾಗೃತಿ ವಾಯ್ಸ್ ಮೈಸೂರು: ವಿಶ್ವವಿಖ್ಯಾತ ಮೈಸೂರು ದಸರಾ ಜಂಬೂ ಸವಾರಿಗೆ ಸಜ್ಜಾಗುತ್ತಿರುವ ಆನೆಗಳಿಗೆ ನಡೆಯುತ್ತಿರುವ ಮರದ ಅಂಬಾರಿ ತರಬೇತಿಯ ವೇಳೆ ಇಂದು ಅನಿರೀಕ್ಷಿತ ಘಟನೆಯೊಂದು ನಡೆದಿದೆ.

ದಸರಾ ಅಂಬಾರಿ ಹೊರುವ ಹೊಣೆ ಹೊತ್ತಿರುವ ಕ್ಯಾಪ್ಟನ್ ಮಹೇಂದ್ರ, ಎರಡನೇ ಬಾರಿಗೆ ಮರದ ಅಂಬಾರಿ ಹೊತ್ತು ತರಬೇತಿಯಲ್ಲಿ ಪಾಲ್ಗೊಂಡಿದ್ದು, ಅರಮನೆಯಿಂದ ಕೆ.ಆರ್. ಸರ್ಕಲ್ ಕಡೆಗೆ ಸಾಗುವ ಸಂದರ್ಭದಲ್ಲಿ ಕೆಲ ಹಂತಗಳಲ್ಲಿ ಆತಂಕಗೊಂಡು ನಿಂತಿದ್ದಾನೆ.

ಮರದ ಅಂಬಾರಿಯನ್ನು ಹೊತ್ತು ಕೆ.ಆರ್. ಸರ್ಕಲ್‌ವರೆಗೆ ಬಂದ ಮಹೇಂದ್ರ, ಅಲ್ಲಿಂದ ಕೆ.ಆರ್. ಆಸ್ಪತ್ರೆ ಸರ್ಕಲ್‌ವರೆಗೆ ಸಾಗುವ ವೇಳೆ ಸುಮಾರು ಐದು ಬಾರಿ ನಿಂತಿದ್ದಾನೆ. ಅಂಬಾರಿಯ ಭಾರ ಹಾಗೂ ಸುತ್ತಮುತ್ತಲಿನ ವಾತಾವರಣದಿಂದ ಆತಂಕಗೊಂಡಂತೆ ಕಂಡುಬಂದ ಮಹೇಂದ್ರನನ್ನು ಮುಂದಕ್ಕೆ ಕರೆದೊಯ್ಯಲು ಸಿಬ್ಬಂದಿ ಪ್ರಯತ್ನಿಸಿದರು.

ಆದರೆ ಪರಿಸ್ಥಿತಿಯನ್ನು ಗಮನಿಸಿದ ಅಧಿಕಾರಿಗಳು ಹಾಗೂ ಮಾವುತರು ಯಾವುದೇ ಅಪಾಯಕ್ಕೆ ಅವಕಾಶ ನೀಡದಂತೆ ಮುನ್ನೆಚ್ಚರಿಕೆ ವಹಿಸಿದರು. ಸುಮಾರು 45 ನಿಮಿಷಗಳ ಕಾಲ ಮರದ ಅಂಬಾರಿಯೊಂದಿಗೆ ಮುಂದೆ ಸಾಗದೆ ನಿಂತಿದ್ದ ಮಹೇಂದ್ರನಿಂದ ಕೊನೆಗೆ ಅಂಬಾರಿಯನ್ನು ಸಂಪೂರ್ಣವಾಗಿ ತೆಗೆದು, ಬಳಿಕ ಆತನನ್ನು ಸುರಕ್ಷಿತವಾಗಿ ಅರಮನೆಗೆ ಕರೆದುಕೊಂಡು ಹೋಗಲಾಯಿತು.

ಮಹೇಂದ್ರನ ಸುರಕ್ಷತೆಗೆ ಆದ್ಯತೆ ನೀಡಿ ಅಂಬಾರಿಯನ್ನು ತೆರವುಗೊಳಿಸಿದ ನಿರ್ಧಾರಕ್ಕೆ ಸಾರ್ವಜನಿಕರಿಂದಲೂ ಮೆಚ್ಚುಗೆ ವ್ಯಕ್ತವಾಗಿದೆ. ದಸರಾ ಜಂಬೂ ಸವಾರಿಗೆ ಆನೆಗಳನ್ನು ಸಜ್ಜುಗೊಳಿಸುವ ಪ್ರಕ್ರಿಯೆಯಲ್ಲಿ ಇಂತಹ ಅನಿರೀಕ್ಷಿತ ಪರಿಸ್ಥಿತಿ ಎದುರಾಗಿರುವುದು ಎಲ್ಲರಲ್ಲೂ ಆತಂಕ ಮೂಡಿಸಿದೆ.

ಮಹೇಂದ್ರನಿಗೆ ಇದು ಸೋಲಲ್ಲ… ತರಬೇತಿಯ ಮತ್ತೊಂದು ಹಂತ. ಮುಂದಿನ ದಿನಗಳಲ್ಲಿ ನಿರಂತರ ತರಬೇತಿಯ ಮೂಲಕ ಮರದ ಅಂಬಾರಿಯ ಭಾರಕ್ಕೆ ಹಾಗೂ ದಸರಾ ಮೆರವಣಿಗೆಯ ವಾತಾವರಣಕ್ಕೆ ಮಹೇಂದ್ರ ಹೊಂದಿಕೊಳ್ಳುವ ನಿರೀಕ್ಷೆ ಇದೆ.

ಮೈಸೂರು ದಸರೆಯ ವೈಭವವನ್ನು ಹೊತ್ತು ಸಾಗುವ ಗಜಪಡೆಯ ಪ್ರಮುಖ ಆನೆಯಾಗಿ ಮಹೇಂದ್ರನ ಮೇಲೆ ಎಲ್ಲರ ನಿರೀಕ್ಷೆಯೂ ಇದೆ.