ಜನಜಾಗೃತಿ ವಾಯ್ಸ್ : ಬೆಂಗಳೂರು ತ್ಯಾಜ್ಯ ವಿಲೇವಾರಿ ಸದ್ಯ ಬಿಜೆಪಿ ಕಾಂಗ್ರೆಸ್‌ ನಡುವೆ ರಾಜಕೀಯ ಜಿದ್ದಾಜಿದ್ದಿಗೆ ಕಾರಣವಾಗಿದೆ. ಕಸ ವಿಲೇವಾರಿಗೆ ಅವಕಾಶ ಕೊಡದಿದ್ದರೆ ಆ ಊರಲ್ಲಿ ಕಸ ಎತ್ತಲು ಬಿಡಲ್ಲ ಎಂದಿದ್ದ ಡಿಕೆ ಶಿವಕುಮಾರ್‌ಗೆ ದೊಡ್ಡಬಳ್ಳಾಪುರ ಶಾಸಕ ಧೀರಜ್ ಮುನಿರಾಜು ತಿರುಗೇಟು ನಿಡಿದ್ದಾರೆ. ಬೆಂಗಳೂರು ತ್ಯಾಜ್ಯ ಕನಕಪುರಕ್ಕೆ ಹಾಕಿಸಿಕೊಳ್ಳಿ, ಆ ಅನುದಾನ ನೀವೇ ಪಡೆದುಕೊಳ್ಳಿ ಎಂದಿದ್ದಾರೆ.
ದೊಡ್ಡಬಳ್ಳಾಪುರ: ಬೆಂಗಳೂರಿನ ಕಸ ವಿಲೇವಾರಿ ವಿಚಾರವಾಗಿ ಉಪ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್‌ ವಿರುದ್ಧ ಬಿಜೆಪಿ ಶಾಸಕ ಧೀರಜ್ ಮುನಿರಾಜು ಗುರುವಾರ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಬೆಂಗಳೂರು ತ್ಯಾಜ್ಯ ಕನಕಪುರಕ್ಕೆ ಹಾಕಿಸಿಕೊಳ್ಳಿ ಎಂದು ಕಿಡಿಕಾರಿದ್ದಾರೆ.
ಹೆಚ್ಚುವರಿ ಕಸವನ್ನ ಹಾಕಿಸಿಕೊಳ್ಳಲು ವಿರೋಧ ವ್ಯಕ್ತಪಡಿಸಿದ್ದ ಶಾಸಕ ಧೀರಜ್ ಮುನಿರಾಜು ವಿರುದ್ಧ ಅವರ ಕ್ಷೇತ್ರದಲ್ಲಿ ಕಸ ಎತ್ತಲು ಬಿಡುವುದಿಲ್ಲಎಂದು ಡಿಸಿಎಂ ಡಿಕೆ ಶಿವಕುಮಾರ್‌ ಗುಡುಗಿದ್ದರು. ಇದಕ್ಕೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಶಾಸಕ ಧೀರಜ್ ಮುನಿರಾಜು, ‘ದೊಡ್ಡಬಳ್ಳಾಪುರಕ್ಕೆ ಬರುವ ಕಸವನ್ನು ನಿಮ್ಮ ಕ್ಷೇತ್ರ ಕನಕಪುರಕ್ಕೆ ತರಿಸಿಕೊಳ್ಳಿ, ಅಲ್ಲಿಯೇ ವೈಜ್ಞಾನಿಕವಾಗಿ ಕಸ ವಿಲೇವಾರಿ ಮಾಡಿ. ಅಲ್ಲದೇ, ಬೆಂಗಳೂರು ನಗರಕ್ಕೆ, ಬೆಂಗಳೂರು ದಕ್ಷಿಣ ಹತ್ತಿರ ಇದೆ. ತ್ಯಾಜ್ಯ ಸಾಗಿಸುವ ವೆಚ್ಚವೂ ಕಡಿಮೆಯಾಗಲಿದೆ, ಅದಕ್ಕೆ ಸಂಬಂಧಿಸಿದ ಅನುದಾನವಿದ್ದರೆ ಅದನ್ನೂ ಅವರೇ ಪಡೆದುಕೊಳ್ಳಲಿ’ ಎಂದು ತಿರುಗೇಟು ನೀಡಿದ್ದಾರೆ.
ನನ್ನ ಹೋರಾಟ ಮುಂದುವರೆಯಲಿದೆ
ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ ಕಸ ವಿಲೇವಾರಿ ಯೋಜನೆಯನ್ನು ನನ್ನ ತಾಲೂಕಿಗೆ ಮಾತ್ರ ಹೇರಲು ಹೊರಟಿದ್ದಾರೆ. ನನಗೆ ಯಾವ ಕರ್ಮ ಎಂದು ಪ್ರಶ್ನಿಸಿದ ಅವರು, ಟೆಟ್ರಾಫಾರ್ಮ್‌ ತೆರೆಯಲು ಯತ್ನಿಸಿದ್ರೆ, ನಾನು ಶಾಸಕನಾಗಿರೋವರೆಗೂ ಅವಕಾಶ ನೀಡಲ್ಲ ಎಂದು ಎಚ್ಚರಿಸಿದ ಅಧಿವರು, ಅಂಬೇಡ್ಕರ್‌ ಕೊಟ್ಟಿರುವ ಸಂವಿಧಾನದಡಿ, ಜನರು ನೀಡಿರುವ ಅಧಿಕಾರದಡಿ ನನ್ನ ಹೋರಾಟ ಮುಂದುವರೆಯುತ್ತದೆ. ನನ್ನ ವಿರುದ್ಧ ಯಾವುದೇ ಕ್ರಮಕೈಗೊಂಡರೂ ಹೋರಾಟ ನಿಲ್ಲುವುದಿಲ್ಲಎಂದು ಟಾಂಗ್‌ ನೀಡಿದರು.
70 ಕಸದ ಲಾರಿಗಳ ಕಾರ್ಯಾಚರಣೆ
ಕಸ ವಿಲೇವಾರಿ ಘಟಕವಾದ ಎಂಎಸ್‌ಜಿಪಿ ಘಟಕಕ್ಕೆ ಬುಧವಾರದಿಂದ ಎಂದಿನಂತೆ 70 ಕಸದ ಲಾರಿಗಳು ಮಾತ್ರ ಬಂದಿವೆ. ಇಲ್ಲಿನ ಸುತ್ತಮುತ್ತಲಿನ ಗ್ರಾಮಸ್ಥರು ಲಾರಿಗಳು ಬಂದು ಹೋಗುವುದರ ಮೇಲೆ ಒಂದು ಕಣ್ಣಿಟ್ಟು ಕಾವಲು ಕಾಯುತ್ತಿದ್ದಾರೆ. ಲಾರಿಗಳ ಸಂಖ್ಯೆ ಯಥಾಸ್ಥಿತಿಗೆ ಬಂದಿದೆ.
ಕಸ ವಿಲೇವಾರಿ ಕಾರ್ಯ ಗುರುವಾರದಿಂದ ಪುನರಾರಂಭ
ಮಿಟ್ಟಗಾನಹಳ್ಳಿ – ಕಣ್ಣೂರು – ಬೆಳ್ಳಹಳ್ಳಿ ಮತ್ತು ದೊಡ್ಡಬಳ್ಳಾಪುರ ಸಮೀಪದ ಎಂಎಸ್‌ಜಿಪಿ ಘಟಕದ ಸುತ್ತಮುತ್ತಲಿನ ಗ್ರಾಮಸ್ಥರು ಹಾಗೂ ಸ್ಥಳೀಯ ಶಾಸಕರ ವಿರೋಧದಿಂದ ಕಗ್ಗಂಟಾಗಿ ಪರಿಣಮಿಸಿದ್ದ ಕಸದ ಸಮಸ್ಯೆ ಬಗೆಹರಿದಿದೆ. ಘಟಕಗಳಲ್ಲಿ ಕಸ ವಿಲೇವಾರಿ ಕಾರ್ಯ ಗುರುವಾರದಿಂದ ಪುನರಾರಂಭವಾಗಿದೆ.
ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ನಿಯಮಿತದ (ಎಂಎಸ್‌ಡಬ್ಲ್ಯೂಎಂಎಲ್‌) ಅಧಿಕಾರಿಗಳು ಘಟಕಗಳ ಸುತ್ತಮುತ್ತಲಿನ ಗ್ರಾಮಸ್ಥರು ಹಾಗೂ ಸ್ಥಳೀಯ ಶಾಸಕರ ಮನವೊಲಿಸುವಲ್ಲಿಯಶಸ್ವಿಯಾಗಿದ್ದು, ಅನುದಾನದ ಭರವಸೆ ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿಮಿಟ್ಟಗಾನಹಳ್ಳಿ-ಕಣ್ಣೂರು-ಬೆಳ್ಳಹಳ್ಳಿ ಭೂಭರ್ತಿ ಘಟಕ ಹಾಗೂ ಎಂಎಸ್‌ಜಿಪಿ ಘಟಕದಲ್ಲಿಕಸ ವಿಲೇವಾರಿಗೆ ಅವಕಾಶ ಕಲ್ಪಿಸಲಾಗಿದೆ.
ಘಟಕಗಳ ಸುತ್ತಮುತ್ತಲ ಪ್ರದೇಶಗಳ ಅಭಿವೃದ್ಧಿಗೆ ಅನುದಾನ ಬಿಡುಗಡೆಗೆ ಒತ್ತಾಯಿಸಿ ಸ್ಥಳೀಯ ಶಾಸಕರ ಬೆಂಬಲದೊಂದಿಗೆ ಗ್ರಾಮಸ್ಥರು ತ್ಯಾಜ್ಯ ವಿಲೇವಾರಿಗೆ ಅಡ್ಡಿಪಡಿಸಿದ್ದರು. ಪರಿಣಾಮ, ಕಳೆದ ಎರಡು ದಿನಗಳಿಂದ ನಗರದಲ್ಲಿಕಸದ ಸಮಸ್ಯೆ ಉಲ್ಬಣಿಸಿತ್ತು. ಕಸ ತುಂಬಿದ ಕಾಂಪ್ಯಾಕ್ಟರ್‌ಗಳು, ಆಟೊ ಟಿಪ್ಪರ್‌ಗಳು ರಸ್ತೆಗಳಲ್ಲೇ ಸಾಲುಗಟ್ಟಿ ನಿಂತಿದ್ದವು. ಎಲ್ಲೆಂದರಲ್ಲಿರಾಶಿ ಬಿದ್ದಿದ್ದ ಕಸ ದುರ್ವಾವಸನೆ ಬೀರುತ್ತಿತ್ತು.
ಸದ್ಯ ಘಟಕಗಳ ಸುತ್ತಲಿನ ಗ್ರಾಮಸ್ಥರು ಪ್ರತಿಭಟನೆ ಕೈಬಿಟ್ಟಿದ್ದು, ಕಸ ವಿಲೇವಾರಿ ಕಾರ್ಯವು ಯಥಾಸ್ಥಿತಿಗೆ ಮರಳಿದೆ. ಘಟಕಗಳ ಬಳಿಯೇ ಸಾಲುಗಟ್ಟಿ ನಿಂತಿದ್ದ ಕಾಂಪ್ಯಾಕ್ಟರ್‌ಗಳು ಗುರುವಾರ ಬೆಳಗ್ಗೆ 7 ಗಂಟೆಯಿಂದಲೇ ಕಸ ವಿಲೇವಾರಿ ಮಾಡಿವೆ. ನಗರದಲ್ಲಿಆಟೊ ಟಿಪ್ಪರ್‌ಗಳಲ್ಲಿದ್ದ ಕಸವನ್ನು ಕಾಂಪ್ಯಾಕ್ಟರ್‌ಗಳಿಗೆ ವರ್ಗಾಯಿಸಲಾಗಿದೆ
